उठा उठा श्री चक्रधराया, भक्त वाट पहाती ।
पदरी घेऊनी, पवित्र करुनी, भक्ती देई जो जी ।।धृ।।
धरणी आशंसिली, स्पर्श व्हावया, आपुल्या श्रीचरणाचा ।
विरहाग्निने, तप्त जहाली, शीतळ कीजो जी ।।१।।
प्राण उतटुनी कंठा यावा, आर्त नाही तैसी ।
औदार्याचा, सिंधु माझा, प्रेम देई जो जी ।।२।।
प्रातःकाळी प्रभूजी उठले, कृपा दृष्टी वळली ।
तळमळ करीते, भक्त तारिले, तैसे तारी जो जी ।।३।।
अनंत सृष्टी हिंडत आलो, बहु श्रम आला जी ।
कठिण कोरडा, कधी मी तुमच्या, पदरी पडेन जी ।।४।।
अनंत वेळा, प्रमाद जोडूनी , खंती आणिली जी ।
ऐसा मी अपराधी कैसा, योग्य होईन जी ।।५।।
अनिमित्त बंधु, महादानी तू, औदार्य रावो जी ।
पाहू नका तुम्ही अपात्रता ही, वरदान द्या हो जी ।।६।।
कवीने आपुले सुगंधहीन, हे पुष्प वाहिले जी ।
सुगंधहीन ते सुगंधी करुनी, करी घेई जो जी ।।७।।