माझी विनंती अविराज स्वामी गरूडध्वजा ।।धु।।
निर्गुण निरामया निराकारा माया परात्परा ।
साधुसंताच्या माहेरा विश्वाच्या आवधारा ।
प्रेमळ भक्तीच्या प्रियकारा रूक्मिणीच्या वरा ।
आदि सृष्टीच्या मूळ बीजा स्वामी गरूडध्वजा ।।१।।
वसुदेव देवकीचे तप भारी समुद्राचे परी ।
श्रावण वद्य पक्षी आवधारी रोहिणी नक्षत्री ।
तिथी अष्टमी बुधवारी अवतरले श्रीहरी ।
वसुदेव घेऊनिया कडेवरी नेले नंदमंदिरी ।
सेजे पहुडविले महाराजा स्वामी गरूडध्वजा ।।२।।
जागृत होऊनिया नंदराणी पाहे कैवल्यदानी ।
स्वरूप लावण्य तेज तरणी न मावे गगनी ।
आल्या धावुनिया गवळणी गोकुळीच्या कामिनी ।
पुत्र मुख पाहिले नंदानी मधुबिंदु घालूनी ।
घरोघरी आनंदल्या सकळ वृजा स्वामी गरूडध्वजा ।।३।।
सुकृत गवळ्याचे अपार जैसे मेरू मांदार ।
वस्तु लाभली परात्पर मोक्षाचे माहेर ।
सकळ शास्त्राचे निजसार वेदाचे जिव्हार ।
ज्याला ध्यातसे उमावर हरिहर झाले स्थिर ।
ब्रम्हा येऊनिया करी पूजा स्वामी गरूडध्वजा ।।४।।
यशोदा मंदिरी पुतनारि नाना कौतुक करी ।
भोगुनी ब्रजाच्या सुंदरी भोगून ब्रह्मचारी ।
अनंत जीवाला उद्धरी भक्तांचा कैवारी ।
तो हा अवधारी नटधारी शरणागता तारी ।
मल्हारी शाहाबाच्या शिरताजा स्वामी गरूडध्वजा ।।५।।