तुला स्नान घालितो मी चक्रधरराया ।
चक्रधरराया देवा, माल्हनीच्या तनया ।।धु।।
आरंभी तुला मी गंध लावुनिया ।
प्रार्थना करितो नम्र होऊनिया ।
भक्ती भावनेने तुझे गुण गाऊनिया ।।१।।
दही दूध साखर आणि मधुपर्क संग ।
सुगंधित उटण्याने मर्दितसे अंग ।
शीत उष्ण निर्मल पाणी वरी घालुनिया ।।२।।
सुवासिक चंदनाची उटी उगाळुनी ।
अत्तरे सुगंधीत ही त्यात मेळवुनी ।
हळुवार देवा तुझ्या अंगी लावुनिया ।।३।।
टिळा केशराचा भाळी लावुनिया ।
हार सुमनाचा गळा घालुनिया ।
फळे पान नारळ ऐसा विडा वाहुनिया ।।४।।
धूप दीप मंगल आरती तुला ओवाळुनी ।
गातो स्तुती स्तोत्रे दामोदर मुनी ।
आवागमन चुकवी माझे कृपा करूनिया ।।५।।