स्थान

सर्वज्ञ संध्याकाळच्या वेळेस काकड्याहून वडनेरला आले. ते वटेश्वराच्या देवळात झोपण्यासाठी जात होते. त्या वेळी पुजारी देवतेस धुपारती करून परत निघाला होता. तो सर्वज्ञांना म्हणाला, "या देवळात पूजेची भांडी वगैरे आहेत, ती चोरीस जाऊ नयेत म्हणून देवळास कुलूप घातले आहे, तरी तुम्ही पलीकडच्या उत्तरेश्वराच्या देवळात झोपण्यासाठी जा." मग सर्वज्ञ येथे आले. त्यांच्या वेळी येथे उत्तरेश्वराचे देऊळ होते. या ठिकाणी त्यांनी पहुड स्वीकारला. येथील देवळात दोन महाभयंकर भुजंग साप राहत होते. ते रात्री एकमेकांशी भांडत भांडत सर्वज्ञांच्या छातीवर येऊन पडले. तेव्हा त्यांनी दोन्ही श्रीकरांनी दोन्हीही साप बाजूला फेकून दिले. ही घटना सकाळी पुजाऱ्यास कळाली, तेव्हा तो आश्चर्यचकित झाला. (पू. ली. ८० व ८१; स्था. पो.)