स्थान

१) सर्वज्ञ श्रीचक्रधरप्रभू प्रार्थबाइसांना निर्वचन प्रकरण निरूपण करीत होते. तेवढ्यात बाइसा उंचमठातून आल्या आणि म्हणाल्या, "हा बाबा, येथे मी नाही, नागदेव नाही, तरी हे आपण कोणाला निरूपण करीत आहेत?" तेव्हा सर्वज्ञ आवेशून म्हणाले, "आम्हाला जर इच्छा झाली, तर आम्ही एखाद्या खांबालाही निमित्त करून निरूपण करू." असे म्हणून ओट्यापुढील खांबावर थाप मारली. (उ. ली. १२९, स्था. पो.) २) एक दिवशी रात्री जेवणे झाल्यावर सर्वज्ञ निरूपण करीत होते. त्या वेळी भटोबासांना जाड्य आले होते. बाइसा कोणत्या तरी कामाला गेल्या होत्या, त्या आल्या. बाइसा म्हणाल्या, "बाबा, नागदेवाला जाड्य आले आहे, तरी हे आपण कोणाला निरूपण करीत आहेत?" तेव्हा सर्वज्ञ आवेशून म्हणाले, "आम्हाला जर इच्छा झाली, तर आम्ही एखाद्या खांबालाही निमित्त करून निरूपण करू." असे म्हणून ओट्यापुढील खांबावर थाप मारली. (पाठसमुदायाची पोथी सायंकाळचा पूजावसर)